samyagdarśanajñānacāritrāṇi mokṣamārgaḥ

tattvārthaśraddhānaṃ samyagdarśanam

tannisargād adhigamād vā

jīvājīvāsravabaṃdhasaṃvaranirjarāmokṣās tattvam

nāmasthāpanādravyabhāvatas tannyāsaḥ

pramāṇanayair adhigamaḥ

nirdeśasvāmitvasādhanādhikaraṇasthitividhānataḥ

satsaṃkhyākṣetrasparśanakālāṃtarabhāvālpabahutvaiś ca

matiśrutāvadhimanaḥparyayakevalāni jñānam

tatpramāṇe

ādye parokṣam

pratyakṣam anyat

matiḥ smṛtiḥ saṃjñā ciṃtābhinibodha ity anarthāṃtaram

tadiṃdriyāniṃdriyanimittam

avagrahehāvāyadhāraṇāḥ

bahubahuvidhakṣiprānisṛtānuktadhruvāṇāṃ setarāṇām

arthasya

vyaṃjanasyāvagrahaḥ

na cakṣuraniṃdriyābhyām

śrutaṃ matipūrvaṃ dvyanekadvād aśabhedam

bhavapratyayo 'vadhir devanārakāṇām

kṣayopaśamanimittaḥ ṣaḍvikalpaḥ śeṣāṇām

ṛjuvipulamatī manaḥparyayaḥ

viśuddhyapratipātābhyāṃ tadviśeṣaḥ

viśuddhikṣetrasvāmiviṣayebhyo 'vadhimanaḥ paryayayoḥ

matiśrutayor nibandho dravyeṣv asarvaparyāyeṣu

rūpiṣv avidheḥ

tadanantabhāge manaḥparyayasya

sarvadravyaparyāyeṣu kevalasya

ekādīni bhājyāni yugapad ekasmin nācaturbhyaḥ

matiśrutāvadhayo viparyayaś ca

sadasator aviśeṣād yadṛcchopalabdher unmattavat

naigamasaṃgrahavyavahārarjusūtraśabdasamabhirūḍhaivaṃbhūtā nayāḥ

aupaśamikakṣāyikau bhāvau miśraśva jīvasya svatattvam audayikapāriṇāmikau ca

dvinavāṣṭādaśaikaviṃśatitribhedā yathākramam

samyaktvacāritre

jñānadarśanadānalābhabhogopabhogavīryāṇi ca

jñānājñānadarśanalabdhayaś catustritripaṃcabhedāḥ samyaktvacāritrasaṃyamāsaṃyamāś ca

gatikaṣāyaliṃgamithyādarśanājñānāsaṃyatāsiddhaleśyāś catuścatustryekaikaikaikaṣaṅbhedāḥ

jīvabhavyābhavyatvāni ca

upayogo lakṣaṇam

sa dvividho ṣṭacaturbhedaḥ

saṃsāriṇo muktāś ca

samanaskāmanaskāḥ

saṃsāriṇas trasasthāvarāḥ

pṛthivyaptejovāyuvanaspatayaḥ sthāvarāḥ

dvīṃdriyādayas trasāḥ

paṃceṃdriyāṇi

dvividhāni

nirvṛttyupakaraṇe dravyeṃdriyam

labdhyupayogau bhāveṃdriyam

sparśanarasanaghrāṇacakṣuḥśrotrāṇi

sparśarasagaṃdhavarṇaśabdās tadarthāḥ

śrutam aniṃdriyasya

vanaspatyaṃtānām ekam

kṛmipipīlikābhramaramanuṣyādīnām ekaikavṛddhāni

saṃjñinaḥ samanaskāḥ

vigrahagatau karmayogaḥ

anuśreṇi gatiḥ

avigrahā jīvasya

vigrahavatī ca saṃsāriṇaḥ prāk caturbhyaḥ

ekasamayāvigrahā

ekaṃ dvau trīn vānāhārakaḥ

saṃmūrchanagarbhopapādā janma

sacittaśītasaṃvṛtāḥ setarā miśrāś caikaśas tadyonayaḥ

jarāyujāṃḍajapotānāṃ garbhaḥ

devanārakāṇām upapādaḥ

śeṣāṇāṃ saṃmūrchanam

audārikavaikriyikāhārakataijasakārmaṇāni śarīrāṇi

paraṃ paraṃ sūkṣmam

pradeśato 'saṃkhyeyaguṇaṃ prāktaijasāt

anaṃtaguṇe pare

apratīghāte

anādisaṃbaṃdhe ca

sarvasya

tadādīni bhājyāni yugapad ekasminn ācaturbhyaḥ

nirupabhogam aṃtyam

garbhasaṃmūrchanajam ādyam

aupapādikaṃ vaikriyikam

labdhipratyayaṃ ca

taijasam api

śubhaṃ viśuddham avyāghāti cāhārakaṃ pramattasaṃyatasyaiva

nārakasaṃmūrchino napuṃsakāni

na devāḥ

śeṣās trivedāḥ

aupapādikacaramottamadehā saṃkhyeyavarṣāyuṣo 'napavartyāyuṣaḥ

ratnaśarkarāvālukāpaṃkadhūmatamomahātamaḥprabhā bhūmayo ghanāṃbuvātākāśapratiṣṭhāḥ saptādho 'dhaḥ

tāsu triṃśatpaṃcaviṃśatipaṃcadaśadaśatripaṃconaikanarakaśatasahasrāṇi paṃca caiva yathākramam

nārakā nityāśubhataraleśyāpariṇāmadehavedanāvikriyāḥ

parasparodīritaduḥkhāḥ

saṃkliṣṭāsurodīritaduḥkhāś ca prāk caturthyāḥ

teṣv ekatrisaptadaśasaptadaśadvāviṃśatitrayastriṃśatsāgaropamā sattvānāṃ parā sthitiḥ

jaṃbūdvīpalavaṇodādayaḥ śubhanāmāno dvīpasamudrāḥ

dvirdvirviṣkaṃbhāḥ pūrvapūrvaparikṣepiṇo valayākṛtayaḥ

tanmadhye merunābhirvṛtto yojanaśatasahasraviṣkaṃbho jaṃbūdvīpaḥ

bharatahaimavataharivideharamyakahairaṇyavatairāvatavarṣāḥ kṣetrāṇi

tadvibhājinaḥ pūrvāparāyatā himavanmahāhimavanniṣadhanīlarukmiśikhariṇo varṣadharaparvatāḥ

hemārjunatapanīyavaiḍūryarajatahemamayāḥ

maṇivicitrapārśvāḥ

upari mūle ca tulyavistārāḥ

padmamahāpadmatigiṃchakeśarimahāpuṃḍarīkapuṃḍarīkā hradās teṣām upari

prathamo yojanasahasrāyāmas tadardhaviṣkaṃbho hradaḥ

daśayojanāvagāhaḥ

tanmadhye yojanaṃ puṣkaram

taddviguṇadviguṇā hradāḥ puṣkarāṇi ca

tannivāsinyo devyaḥ śrīhrīdhṛtikīrtibuddhilakṣmyaḥ palyopamasthitayaḥ sasāmānikapariṣatkāḥ

gaṃgāsiṃdhūrohidrohitāsyā hariddharikāṃtāsītāsītodānārīnarakāṃtāsuvarṇarūpyakūlāraktāraktodāḥ saritastanmadhyagāḥ

dvayor dvayoḥ pūrvā pūrvagāḥ

śeṣās tv aparagāḥ

caturdaśanadīsahasraparivṛtā gaṃgāsiṃdhvādayo nadyaḥ

bharataḥ ṣaḍviṃśatipaṃcayojanaśatavistāraḥ ṣaṭ caikonaviṃśatibhāgā yojanasya

taddviguṇadviguṇavistārā varṣadharavarṣā videhāṃtāḥ

uttarā dakṣiṇatulyāḥ

bharatairāvatayor vṛddhihrāsau ṣaṭsamayābhyām utsarpiṇy avasarpiṇībhyām

tābhyām aparā bhūmayo 'vasthitāḥ

ekadvitripalyopamasthitayo haimavatakahārivarṣakadaivakuravakāḥ

tathottarāḥ

videheṣu saṃkhyeyakālāḥ

bharatasya viṣkaṃbho jaṃbūdvīpasya navatiśatabhāgaḥ

dvirdhātakīkhaṃḍe

puṣkarārdhe ca

prāṅmānuṣottarān manuṣyāḥ

āryā mlecchāś ca

bharatairāvatavidehāḥ karmabhūmayo 'nyatra devakurūttarakurubhyaḥ

nṛsthitī parāvare tripalyopamāṃtarmuhūrte

tiryagyonijānāṃ ca

devāś caturṇikāyāḥ

āditas triṣu pītāṃtaleśyāḥ

daśāṣṭapaṃcadvādaśavikalpāḥ kalpopapannaparyaṃtāḥ

iṃdrasāmānikatrāyastriṃśapāriṣadātmarakṣalokapālānīkaprakīrṇakābhiyogyakilbiṣikāś caikaśaḥ

trāyastriṃśalokapālavarjyā vyaṃtarajyotiṣkāḥ

pūrvayor dvīndrāḥ

kāyapravīcārā ā aiśānāt

śeṣāḥ sparśarūpaśabdamanaḥpravīcārāḥ

pare 'pravīcārāḥ

bhavanavāsino 'suranāgavidyutsuparṇāgnivātastanitodadhidvīpadikkumārāḥ

vyaṃtarāḥ kiṃnarakiṃpuruṣamahoragagaṃdharvayakṣarākṣasabhūtapiśācāḥ

jyotiṣkāḥ sūryācaṃdram asau grahanakṣatraprakīrṇakatārakāś ca

merupradakṣiṇā nityagatayo nṛloke

tatkṛtaḥ kālavibhāgaḥ

bahiravasthitāḥ

vaimānikāḥ

kalpopapannāḥ kalpātītāś ca

uparyupari

saudharmaiśānasānatkamāramāheṃdrabrahmalokabrahmottaralāṃtavakāpiṣṭhaśukramahāśukrasatārasahasrāreṣv ānataprāṇatayor āraṇācyutayor navasu graiveyakeṣu vijayavaijayaṃtajayaṃtāparājiteṣu sarvārthasiddha ca

sthitiprabhāvasukhadyutileśyāviśuddhīṃdriyāvadhiviṣayato dhikāḥ

gatiśarīraparigrahābhimānato hīnāḥ

pītapadmaśuklaleśyā dvitriśeṣeṣu

prāggraiveyakebhyaḥ kalpāḥ

brahmalokālayā laukāṃtikāḥ

sārasvatād ity avanhyaruṇagardatoyatuṣitāvyābādhāriṣṭāś ca

vijayādiṣu dvicaramāḥ

aupapādikamanuṣyebhyaḥ śeṣāstiryagyonayaḥ

sthitir asuranāgasuparṇadvīpaśeṣāṇāṃ sāgaropamatripalyopamārdhahīnamitā

saudharmaiśānayoḥ sāgaropame dhike

sānatkumāramāheṃdrayoḥ sapta

trisaptanavaikādaśatrayodaśapaṃcadaśabhir adhikāni tu

āraṇācyutād ūrdhvam ekaikena navasu graiveyakeṣu vijayādiṣu sarvārthasiddhau ca

aparā palyopamam adhikam

parataḥ parataḥ pūrvā pūrvānaṃtarā

nārakāṇāṃ ca dvitīyādiṣu

daśavarṣasahasrāṇi prathamāyām

bhavaneṣu ca

vyaṃtarāṇāṃ ca

parāpalyopamam adhikam

jyotiṣkāṇāṃ ca

tadaṣṭabhāgo 'parā

ajīvakāyā dharmādharmākāśapudgalāḥ

dravyāṇi

jīvāś ca

nityāvasthitāny arūpāṇi

rūpiṇaḥ pudgalāḥ

ā ākāśād ekadravyāṇi

niṣkriyāṇi ca

asaṃkhyeyāḥ pradeśā dharmādharmaikajīvānām

ākāśasyānaṃtāḥ

saṃkhyeyāsaṃkhyeyāś ca pudgalānām

nāṇoḥ

lokākāśe 'vagāhaḥ

dharmādharmayoḥ kṛtsne

ekapradeśādiṣu bhājyaḥ pudgalānām

asaṃkhyeyabhāgādiṣu jīvānām

pradeśasaṃhāravisarpābhyāṃ pradīpavat

gatisthityupagrahau dharmādharmayor upakāraḥ

ākāśasyāvagāhaḥ

śarīravāṅmanaḥprāṇāpānāḥ pudgalānām

sukhaduḥkhajīvitamaraṇopagrahāś ca

parasparopagraho jīvānām

vartanā pariṇāmaḥ kriyā paratvāparatve ca kālasya

sparśarasagaṃdhavarṇavaṃtaḥ pudgalāḥ

śabdabaṃdhasaukṣmyasthaulyasaṃsthānabhedatamaśchāyātapodyotavaṃtaś ca

aṇavaḥ skaṃdhāś ca

bhedasaṃghātebhya utpadyaṃte

bhedād aṇuḥ

bhedasaṃghātābhyāṃ cākṣuṣaḥ

saddravyalakṣaṇam

utpādavyayadhrauvyayuktaṃ sat

tadbhāvāvyayaṃ nityaṃ

arpitānarpitasiddheḥ

snigdharūkṣatvād baṃdhaḥ

na jaghanyaguṇānām

guṇasāmye sadṛśānām

dvyadhikādiguṇānāṃ tu

baṃdhe dhikau pāriṇāmikau

guṇaparyayavaddravyam

kālaś ca

so 'naṃtasamayaḥ

dravyāśrayā nirguṇā guṇāḥ

tadbhāvaḥ pariṇāmaḥ

kāryavāṅ manaḥkarma yogaḥ

sa āsravaḥ

śubhaḥ puṇyasyāśubhaḥ pāpasya

sakaṣāyākaṣāyayoḥ sāṃparāyikeryāpathayoḥ

iṃdriyakaṣāyāvratakriyāḥ paṃcacatuḥpaṃcapaṃcaviṃśatisaṃkhyāḥ pūrvasya bhedāḥ

tīvramaṃdajñātājñātabhāvādhikaraṇavīryaviśeṣebhyas tadviśeṣaḥ

adhikaraṇaṃ jīvājīvāḥ

ādyaṃ saṃraṃbhasamāraṃbhāraṃbhayogakṛtakāritānumatakaṣāyaviśeṣais tristristriścatuś caikaśaḥ

nirvartanānikṣepasaṃyoganisargā dvicaturdvitribhedāḥ param

tatpradoṣanihnavamātsaryāṃtarāyāsādanopaghātā jñātadarśanāvaraṇayoḥ

duḥkhaśokatāpākraṃdanabadhaparidevanānyātmaparobhayasthānyasadvedyasya

bhūtavratyanukaṃpādānasarāgasaṃyam ādiyogaḥ kṣāṃtiḥ śaucam iti sadvedyasya

kevaliśrutasaṃghadharmadevāvarṇavādo darśanamohasya

kaṣāyodayāt tīvrapariṇāmaś cāritramohasya

bahvāraṃbhaparigrahatvaṃ nārakasyāyuṣaḥ

māyā tairyagyonasya

alpāraṃbhaparigrahatvaṃ mānuṣasya

svabhāvamārdavaṃ ca

niḥśīlavratatvaṃ ca sarveṣām

sarāgasaṃyamasaṃyamāsaṃyamākāmanirjarābālatapāṃsi daivasya

samyaktvaṃ ca

yogavakratā visaṃvādanaṃ cāśubhasya nāmnaḥ

tadviparītaṃ śubhasya

darśanaviśuddhir vinayasaṃpannatā śīlavrateṣv anatīcāro 'bhīkṣṇajñānopayogasaṃvegau śaktitas tyāgatapasī sādhusamādhir vaiyāvṛtyakaraṇam arhadācāryabahuśrutapravacanabhaktir āvaśyakāparihāṇir mārgaprabhāvanā pravacanavatsalatvam iti tīrthakaratvasya

parātmaniṃdāpraśaṃse sadasadguṇacchādanodbhāvane ca nīcair gotrasya

tadviparyayo nīcair vṛttyanutsekau cottarasya

vighnakaraṇam aṃtarāyasya

hiṃsānṛtasteyābrahmaparigrahebhyo viratirvratam

deśasarvato 'ṇumahatī

tatsthairyārthaṃ bhāvanāḥ paṃca paṃca

vāṅmanoguptīryādānanikṣepaṇasamityālokitapānabhojanāni paṃca

krodhalobhabhīrutvahāsyapratyākhyānāny anuvīcībhāṣaṇaṃ ca paṃca

śūnyāgāravimocitāvāsaparoparodhākaraṇabhaikṣyaśuddhisadharmāvisaṃvādāḥ paṃca

strīrāgakathāśravaṇatanmanoharāṃganirīkṣaṇapūrvaratānusparaṇavṛṣyeṣṭarasaśarīrasaṃskāratyāgāḥ paṃca

manojñāmanojñeṃdriyaviṣayarāgadveṣavarjanāni paṃca

hiṃsādiṣv ihāmutrāpāyāvadyadarśanam

duḥkham eva vā

maitrīpramodakāruṇyam ādhyasthyāni ca sattvaguṇādhikakliśyamānāvinayeṣu

jagatkāyasvabhāvau vā saṃvegavairāgyārtham

pramattayogāt prāṇavyaparopaṇaṃ hiṃsā

asadabhidhānam anṛtam

adattādānaṃ steyam

maithunam abrahma

mūrchā parigrahaḥ

niḥśalyo vratī

agāryanagāraś ca

aṇuvrato 'gārī

digdeśānarthadaṃḍaviratisāmāyikaproṣadhopavāsopabhogaparibhogaparimāṇātithisaṃvibhāgavratasaṃpannaś ca

māraṇāṃtikīṃ sallekhanāṃ joṣitā

śaṃkākāṃkṣāvicikitsānyadṛṣṭipraśaṃsāsaṃstavāḥ samyagdṛṣṭer atīcārāḥ

vrataśīleṣu paṃca paṃca yathākramam

baṃdhavadhacchedātibhārāropaṇān na pānanirodhāḥ

mithyopadeśaraho bhyākhyānakūṭalekhakriyānyāsāpahārasākāramaṃtrabhedāḥ

stenaprayogatadāhṛtādānaviruddharājyātikramahīnādhikamānonmānapratirūpakavyavahārāḥ

paravivāhakaraṇetvarikāparigṛhītāparigṛhītāgamanānaṃgakrīḍākāmatīvrābhiniveśāḥ

kṣetravāstuhiraṇyasuvarṇadhanadhānyadāsīdāsakupyapramāṇātikramāḥ

ūrdhvādhas tiryagvyatikramakṣetravṛddhismṛtyaṃtarādhānāni

ānayanapreṣyaprayogaśabdarūpān upātapudgalakṣepāḥ

kaṃdarpakautkucyamaukharyāsamīkṣyādhikaraṇopabhogaparibhogānarthakyāni

yogaduḥpraṇidhānānādarasmṛtyanupasthānāni

apratyavekṣitāpramārjitotsargādānasaṃstaropakramaṇānādarasmṛtyanupasthānāni

sacittasaṃbaṃdhasaṃmiśrābhiṣavaduḥpakvāhārāḥ

sacittanikṣepāpidhānaparavyapadeśamātsaryakālātikramāḥ

jīvitamaraṇāśaṃsāmitrānurāgasukhānubaṃdhanidānāni

anugrahārthaṃ svasyātisargo dānam

vidhidravyadātṛpātraviśeṣāt tadviśeṣaḥ

mithyādarśanāviratipramādakaṣāyayogā baṃdhahetavaḥ

sakaṣāyatvāj jīvaḥ karmaṇo yogyān pudgalān ādatte sa baṃdhaḥ

prakṛtisthityanubhāgabhavapradeśās tadvidhayaḥ

ādyo jñānadarśanāvaraṇavedanīyamohanīyāyurnāmagotrāṃtarāyāḥ

paṃcanavadvyaṣṭāviṃśaticaturdvicatvāriṃśaddvipaṃcabhedā yathākramam

matiśrutāvadhimanaḥparyayakevalānām

cakṣuracakṣuravadhikevalānāṃ nidrānidrānidrāpracalāpracalāpracalāstyānagṛddhayaś ca

sadasadvedye

darśanacāritramohanīyākaṣāyakaṣāyavedanīyākhyās tridvinavaṣoḍaśabhedāḥ samyaktvamithyātvatadubhayānyakaṣāyakaṣāyau hāstaratyaratiśokabhayajugupsāstrīpunnapuṃsakavedā anaṃtānubaṃdhyapratyākhyānapratyākhyānasaṃjvalanavikalpāś caikaśaḥ krodhamānamāyālobhāḥ

nārakatairyagyonamānuṣadaivāni

gatijātiśarīrāṃgopāṃganirmāṇabaṃdhanasaṃghātasaṃsthānasaṃhananasparśarasagaṃdhavarṇānupūrvyāgurulaghūpaghātaparaghātātapodyotocchvāsavihāyogatayaḥ pratyekaśarīratrasasubhagasusvaraśubhasūkṣmaparyāptisthirādeyayaśaskīrtisetarāṇi tīrthakaratvaṃ ca

uccair nīcaiś ca

dānalābhabhogopabhogavīryāṇam

āditas tisṛṇām aṃtarāyasya ca triṃśatsāgaropamakoṭīkoṭyaḥ parā sthitiḥ

saptatir mohanīyasya

viṃśatir nāmagotrayoḥ

trayastriṃśatsāgaropamāṇyāyuṣaḥ

aparā dvādaśa muhūrtā vedanīyasya

nāmagotrayor aṣṭau

śeṣāṇām aṃtarmuhūrtā

vipāko 'nubhavaḥ

sa yathānāma

tataś ca nirjarā

nāmapratyayāḥ sarvato yogaviśeṣāt sūkṣmaikakṣetrāvagāhasthitāḥ sarvātmapradeśeṣv anaṃtānaṃtapradeśāḥ

sadvedyaśubhāyurnāmagotrāṇi puṇyam

ato nyat pāpam

āsravanirodhaḥ saṃvaraḥ

sa guptisamitidharmānuprekṣāparīṣahajayacāritraiḥ

tapasā nirjarā ca

samyagyoganigraho guptiḥ

īryābhāṣaiṣaṇādānanikṣepotsargāḥ samitayaḥ

uttamakṣamāmārdavārjavaśaucasatyasaṃyamatapastyāgākiṃcanyabrahmacaryāṇi dharmaḥ

anityāśaraṇasaṃsāraikatvānyatvāśucyāsravasaṃvaranirjarālokabodhidurlabhadharmasvākhyātatvānuciṃtanam anuprekṣāḥ

mārgācyavananirjarārthaṃ pariṣoḍhavyāḥ parīṣahāḥ

kṣutpipāsāśītoṣṇadaṃśamaśakanāgnyāratistrīcaryāniṣadyāśayyākrośavadhayācanālābharogatṛṇasparśamalasatkārapuraskāraprajñājñānādarśanāni

sūkṣmasāṃparāyachadmasthavītarāgayoś caturdaśa

ekādaśa jine

bādarasāṃparāye sarve

jñānāvaraṇe prajñājñāne

darśanamohāṃtarāyayor adarśanālābhau

cāritramohe nāgnyāratistrīniṣadyākrośayācanāsatkārapuraskārāḥ

vedanīye śeṣāḥ

ekādayo bhājyā yugapad ekasminn aikonaviṃśateḥ

sāmāyikachedopasthāpanāparihāraviśuddhisūkṣmasāṃparāyayathākhyātam iti cāritram

anaśanāvamaudaryavṛttiparisaṃkhyānarasaparityāgaviviktaśayyāsanakāyakleśāḥ bāhyaṃ tapaḥ

prāyaścittavinayavaiyāvṛttyasvādhyāyavyutsargadhyānāny uttaram

navacaturdaśapaṃcadvibhedā yathākramaṃ prāgdhyānāt

ālocanapratikramaṇatadubhayavivekavyutsargatapaśchedaparihāropasthāpanāḥ

jñānadarśanacāritropacārāḥ

ācāryopādhyāyatapasviśaikṣyaglānagaṇakulasaṃghasādhumanojñānām

vācanāpṛcchanānuprekṣām nāyadharmopadeśāḥ

bāhyābhyaṃtaropadhyoḥ

uttamasaṃhananasyaikāgraciṃtānirodho dhyānamāṃtarmuhūrtāt

ārtaraudradharmyaśuklāni

pare mokṣahetū

ārtam amanojñasya saṃprayoge tadviprayogāya smṛtisamanvāhāraḥ

viparītaṃ manojñasya

vedanāyāś ca

nidānaṃ ca

tadaviratadeśaviratapramattasaṃyatānām

hiṃsānṛtasteyaviṣayasaṃrakṣaṇebhyo raudram aviratadeśaviratayoḥ

ājñāpāyavipākasaṃsthānavicayāya dharmyam

śukle cādye pūrvavidaḥ

pare kevalinaḥ

pṛthaktvaikatvavitarkasūkṣmakriyāpratipātivyuparatakriyānivartīni

tryekayogakāyayogāyogānām

ekāśraye savitarkavīcāre pūrve

avīcāraṃ dvitīyam

vitarkaḥ śrutam

vīcāro rthavyaṃjanayogasaṃkrāṃtiḥ

samyagdṛṣṭiśrāvakaviratānaṃtaviyojakadarśanamohakṣapakopaśamakopaśāṃtamohakṣapakakṣīṇamohajināḥ kramaśo 'saṃkhyeyaguṇanirjarāḥ

pulākabakuśakuśīlanirgraṃthasnātakā nirgraṃthāḥ

saṃyamaśrutapratisevanātīrthaliṃgaleśyopapādasthānavikalpataḥ sādhyāḥ

mohakṣayāt jñānadarśanāvaraṇāṃtarāyakṣayāc ca kevalam

baṃdhahetvabhāvanirjarābhyāṃ kṛtsnakarmavipramokṣo mokṣaḥ

aupaśamikādibhavyatvānāṃ ca

anyatra kevalasamyaktvajñānadarśanasiddhatvebhyaḥ

tadanaṃtaram ūrdhvaṃ gacchatyālokāṃtāt

pūrvaprayogād asaṃgatvād baṃdhacchedāt tathā gatipariṇāmāc ca

āviddhakulālacakravadvyapagatalepālābuvader aṃḍabījavad agniśikhāvac ca

dharmāstikāyābhāvāt

kṣetrakālagatiliṃgatīrthacāritrapratyekabuddhabodhitajñānāvagāhanāṃtarasaṃkhyālpabahutvataḥ sādhyāḥ